داليا جمال تكتب .. ماسورة مهازل ..واتفتحت !
الجمعة 01-03-2024 21:53
ماسورة مهازل ..واتفتحت علينا إسمها “التيك توك ” ،
لا ليها طعم ولا لون..وعنونها الرئيسي هو” الإبتذال ”
مئات بل آلاف الفيديوهات أبطالها شخصيات مجهوله ، كان مكانهم الطبيعي جنب الحيط ، ستات بيوت لا يعرفن سوي المطبخ وتربية الفراخ فوق السطوح ، فجأه وبقدرة قادر أصبحت الواحده فيهم من المشاهير ولها متابعين!
وكل مره قصه هابطه من تأليف البطل أو البطله ، مره حماتها بتزورها ، فتعامل حماتها كخادمه دون علم زوجها، اما في حضوره فتعيش دور الملاك البرئ ، والولد يكتشف ان مراته بتخبي الاكل وتمنع امه من الاكل وتعاملها كخادمه فيطردها من البيت …فيلم عربي هابط !
وهناك الشاب المصري المتزوج من روسيه وبيعمل فيديوهات تيك توك ليومياته مع زوجته اللي بتحاول تتكلم مصري مكسر ، بمساعدة والده ووالدته وطفلته الرضيعه ” بمواقف قمه في السخافه ” .
هذا بخلاف الست المنقبه المحترمه التي تقوم بتعليم السيدات فن الطهي وهي لابسه ملايس ملتصقه بجسمها ! والأخت التي تحكي قصص قلة اصل اخواتها ، واللي بيطرد أمه واخوه من بيته إرضاء لزوجته .
ولا البنت الفظيعه المريعه اللي بتطلع تستظرق وتصرخ وتقول لوالدها عاوزه فلوس ، فيديها الاف الجنيهات تشتري ملابس واكسسوار !! وترجع تصرخ بشكل جنوني وبصوت لا يليق الا بحمار يحر عربية تبن في شارع ضيق !!
وللاسف ..ماسورة المهازل التي اتفتحت علينا بالتيك توك، والأشكال البشريه الضاله ، لأشخاص كانوا مجرد مجموعه من الناس العاديين فتحولوا لنجوم تيك توك ، بيقبضوا من الفيديوهات الهابطه الاف الدولارت ،وبسببهم يحصد الشعب المصري كله نظرات الإزدراء والشماتة ، من كل جنسيات العالم ، لما تحتويه هذه الفيديوهات من قصص مسيئه ومنفره تعكس وجه قبيح وغير حقيقي للأسر المصريه والمصريين ، وكل ده ليه ؟ لأن هناك أشخاص لا يعنيهم الا تحقيق اي مكسب بأي وسيله !
سواء استغل زوجته وأمه وحماته للإشتراك في قصص وهميه من تأليفه لزوم الحبكه الدراميه ، وحتي وصلت للست اللي بتعمل الكفته في أوضة النوم وهي لابسه جلابيه بلدي وطرحه ، وبعد كام فيديو..تخرج علينا نفس السيده ولكن بلوك جديد ، يشبه الست( إيرما لادوس) ، في فيلم عفريت مراتي !!
بكل أسي وأسف لا أعرف ماذا اصاب الأسر المصريه من إضطراب ، جعلهم يبيعون الغالي زالنفيس من احترام وقيم واخلاق المصريين ، مقابل الفلوس !
ولا اعرف لماذا لا. يتحرك المركز القومي للبحوث الاجتماعيه ، لوقف هذه السلوكيات الهابطه ، ومتي يتحرك نواب الشعب لوضع ضوابط لوقف مهازل التيك توك بكل مافيه من محتوي يضر بالمجتمع المصري ، لنغلق ماسورة مهازل التيك توك. الي الأبد.
اضف تعليق
